大家好, 我係吉少. 今次等我客串返一篇先, 第一, 因為今次單車活動真係好難忘; 另外, 太魯閣嘅壯麗風景我都想同大家分享一下.  武嶺, 係東南亞公路嘅最高點, 位於海拔 3275米. 係好多單車愛好者都想用自己腳力到達嘅聖地…不過其實呢啲都係單車仔先熟悉嘅姐. 其實就係好多朋友響清境未訓醒就搭旅遊巴上去睇日出嘅合歡山 .

以下介紹係好單車向, 無興趣可直接跳過去遊記部份😜

到達武嶺可以由台中嘅埔里開始, 又或者由花蓮嘅太魯閣開始. 兩者同樣係超弩級嘅單車路線. 但係前者比較短, 同埋斜度比較統一, 有些少空間可以自己分配體力, 所以絕大多數人第一次挑戰就係由台中上去.

由花蓮上去就唔同, 開始直到大禹嶺都唔太難, 但係一過大禹嶺就突然勁斜. 其時已經係海拔2500米, 空氣有少少稀薄, 同埋一般來講, 去到果個位都已經踩左4小時, 體力都消耗左唔少. 三個因素加埋, 令呢短短十公里路有天堂路之稱…

*********遊記部份*********
我地計劃去4日, 頭一日係安頓自己同單車, 第二日係見朋友, 第3日先係真正挑戰大山. 第4日就台中及高雄閑遊及回港. 不過刺激由出發前已經開始.

一如一般遊台安排, 我地原來都係駁住個週末由21/10 星期五飛台北, 由包車載我地花蓮, 24/10 回港. 但係其實由果個禮拜頭開始, 我地已經頗為擔心, 因為颱風海馬已經慢慢逼近. 但更令人坐立不安嘅係, 天文台預測海馬最接近係 21 號. 而我地係十點幾出發, 如果海馬行慢少少, 我地就可以趕得切逃離其魔掌. 相反, 我地成個旅程就會泡湯.

20/10星期四上午, 全部團員基本上響公司都係扮工. 為嘅係討論下21號上午會唔會八號風球. 但係講講下. 大概下晝兩點幾, 大家決定就於當晚緊急行軍, 目的地改為高雄! 於是我地響短短兩小時內訂購機票同酒店. 同埋緊急聯絡包車由台北改到高雄. 當然這麼誇張的改動我地都打定輸數, 諗住如果現有包車幫唔到我地, 我地就到當地再搵另一間.

殊不知當我地通知佢嘅時侯, 佢身在台中! 到高雄或台北分別都不大, 所以佢都好樂意配合. BTW, 我地幫襯嘅包車公司服務周到, 一般包車旅遊當然安排妥當, 而對於支援單車團更加經驗老到. 今次已經係我地第4次搵佢幫手. 以下係佢地        https://www.facebook.com/jerry.car.rental.service/?fref=ts

到左呢一刻, 我地覺得所有問題都已攪掂. 係等飛矣已…